വെള്ളിയാഴ്ച കോഴിക്കോട് മീഞ്ചന്ത ഗവൺമെന്റ് ആർട്‌സ് ആൻഡ് സയൻസ് കോളേജിൽ സമാപിച്ച കാലിക്കറ്റ് യൂണിവേഴ്‌സിറ്റി ബി സോൺ കലോത്സവത്തിൽ 'റോസ ബിയാങ്ക'യിൽ ദേവഗിരി സെന്റ് ജോസഫ് കോളേജ് ഓവറോൾ ചാമ്പ്യന്മാരായി. ബി സോൺ കലോത്സവം ‘റോസ ബിയങ്ക’യിൽ 246 പോയിന്റുമായാണ്‌ സെന്റ് ജോസഫ്സ് കോളേജ് ദേവഗിരി ഓവറോൾ ചാമ്പ്യന്മാരായത്‌. 2018ലും 19ലും ദേവഗിരിക്കായിരുന്നു കിരീടം. 146 പോയിന്റ് നേടിയ ഫാറൂഖ് കോളേജിനാണ് രണ്ടാം സ്ഥാനം. 83 പോയിന്റുമായി പ്രൊവിഡന്‍സ് വിമന്‍സ് കോളേജ് മൂന്നാമതായി. 52 പോയിന്റുമായി ആതിഥേയരായ ആര്‍ട്സ് ആന്‍ഡ് സയന്‍സ് കോളേജ് നാലാമതും 50 പോയിന്റുമായി സാമൂതിരി ഗുരുവായൂരപ്പന്‍ കോളേജ് അഞ്ചാമതുമാണ്.
അഞ്ച് ദിവസങ്ങളായി നടന്ന മേളയിൽ സാഹിത്യോത്സവം, നൃത്തോത്സവം, സംഗീതോത്സവം, ചിത്രോത്സവം, ഓഫ് സ്റ്റേജ് ഇനങ്ങളില്‍ ദേവഗിരി തുടക്കത്തിലേ മേധാവിത്വം പുലര്‍ത്തി. ഗാനമേള, നാടോടി സംഗീതം, സ്കിറ്റ് തുടങ്ങിയ ഗ്രൂപ്പ് ഇനങ്ങളിലും തുള്ളല്‍, ഭരതനാട്യം, മോഹിനിയാട്ടം തുടങ്ങി ഇരുപതോളം വ്യക്തിഗത ഇനങ്ങളിലും ദേവഗിരി ഒന്നാം സ്ഥാനം നേടി.
സമാപനസമ്മേളനം മന്ത്രി പി എ മുഹമ്മദ് റിയാസ് ഉദ്ഘാടനം ചെയ്തു. സര്‍വകലാശാല യൂണിയൻ വൈസ് ചെയര്‍മാന്‍ എസ് ആര്‍ അശ്വിന്‍ അധ്യക്ഷനായി. സ്വാഗതസംഘം കണ്‍വീനര്‍ കെ വി അനുരാഗ്, ജോയിന്റ് കണ്‍വീനര്‍ പി താജുദ്ദീന്‍, പ്രോഗ്രാം കമ്മിറ്റി ചെയര്‍മാന്‍ സോണിയ ഇ പ എന്നിവര്‍ സംസാരിച്ചു. കെ ഗായത്രി സ്വാഗതവും ജാന്‍വി കെ സത്യന്‍ നന്ദിയും പറഞ്ഞു.
