ബേപ്പൂരിലെ വിനോദസഞ്ചാര വികസനത്തിന് അന്താരാഷ്ട്ര അംഗീകാരം ലഭിച്ചു. നെതര്ലന്ഡ്സ് ആസ്ഥാനമായി പ്രവര്ത്തിക്കുന്ന ഗ്രീന് ഡെസ്റ്റിനേഷന്സ് സംഘടനയുടെ ആഗോള സുസ്ഥിര വിനോദസഞ്ചാര കേന്ദ്രങ്ങളെ അടയാളപ്പെടുത്തുന്ന ‘നൂറ് ഗ്രീന് ഡെസ്റ്റിനേഷന്സ് 2025’ പട്ടികയിലാണ് ബേപ്പൂര് സ്ഥാനം നേടിയത്. ‘സംസ്കാരവും പൈതൃകവും’ എന്ന വിഭാഗത്തില് ഉള്പ്പെടുത്തിയാണ് അംഗീകാരം.
ഏഷ്യയിലെ 32 വിനോദസഞ്ചാര കേന്ദ്രങ്ങള് ഉള്പ്പെട്ട പട്ടികയില് ഇന്ത്യയില്നിന്ന് ബേപ്പൂരും തമിഴ്നാട്ടിലെ മഹാബലിപുരവുമാണ് തിരഞ്ഞെടുക്കപ്പെട്ടത്. ഏഷ്യാ പസഫിക് സിറ്റീസ് കോണ്ഫറന്സിനോടനുബന്ധിച്ച് ഈ മാസം അവസാനം ദുബൈയില് നടക്കുന്ന ‘സുസ്ഥിര വിനോദസഞ്ചാര ഫോറ’ത്തില് അംഗീകാര സാക്ഷ്യപത്രം സമ്മാനിക്കും.
