മുഖ്യമന്ത്രിയുടെ ഡെവലപ്മെന്റൽ ഇന്റർവെൻഷനുള്ള ഇന്നൊവേഷൻ അവാർഡ് 'നമ്മുടെ കോഴിക്കോട്' ന്

പൊതുനയത്തിലെ ആശയങ്ങൾക്കായി കേരള സർക്കാർ ഏർപ്പെടുത്തിയ മുഖ്യമന്ത്രിയുടെ ഇന്നവേഷൻ അവാർഡ് 'നമ്മുടെ കോഴിക്കോട്' പദ്ധതിക്ക് ലഭിച്ചു. ജില്ലാ ഭരണകൂടത്തിന്റെ നേതൃത്വത്തിൽ ജനകീയ മുന്നേറ്റം ലക്ഷ്യമിട്ട് ആരംഭിച്ച വികസന ഇടപെടൽ വിഭാഗത്തിലാണ് അവാർഡ്. 2018, 2019, 2020 വർഷങ്ങളിലെ മികച്ച പ്രവർത്തനങ്ങളും നൂതന പദ്ധതികളും പരിഗണിച്ചാണ് ഈ അവാർഡ് പ്രഖ്യാപിച്ചത്.2018 ജനുവരിയിൽ മാനാഞ്ചിറ മൈതാനിയിൽ നടന്ന ചടങ്ങിൽ മുഖ്യമന്ത്രി പിണറായി വിജയൻ പദ്ധതിക്ക് തുടക്കം കുറിച്ചു.

ജില്ലാ ഭരണകൂടത്തിന്റെ നേതൃത്വത്തിൽ തദ്ദേശ സ്വയംഭരണ സ്ഥാപനങ്ങളുടെയും ജനപ്രതിനിധികളുടെയും ജില്ലയിലെ മുഴുവൻ വകുപ്പുകളുടെയും ഏകോപനത്തിൽ ജനകീയ പങ്കാളിത്തത്തോടെ നിരവധി നൂതന വികസന പദ്ധതികളും ജനക്ഷേമ പ്രവർത്തനങ്ങളും നടത്തിവരുന്നു. 'നമ്മുടെ കോഴിക്കോട്' പദ്ധതി കഴിഞ്ഞ മൂന്ന് വർഷമായി ഫലപ്രദമായി നടപ്പിലാക്കി വരുന്നു. മിഷൻ കോഴിക്കോട് എന്ന പേരിൽ തയ്യാറാക്കിയ സമഗ്ര രൂപരേഖയുടെ അടിസ്ഥാനത്തിൽ ഒട്ടേറെ വികസന പ്രവർത്തനങ്ങൾ മാതൃകാപരമായി വലിയ ജനപിന്തുണയോടെ നടപ്പിലാക്കാനും സാധിച്ചിട്ടുണ്ട്.

അംഗൻവാടികളുടെ നവീകരണവും ഗുണമേന്മ മെച്ചപ്പെടുത്തുന്നതിനുമായി നടപ്പിലാക്കിയ 'ക്രാഡിൽ' പദ്ധതി, കോഴിക്കോടിനെ ഭിന്നശേഷി സൗഹൃദ ജില്ലയാക്കുന്നതും അവരുടെ സമഗ്ര വികസനവും ലക്ഷ്യമാക്കി ആരംഭിച്ച 'എനേബിളിങ്ങ് കോഴിക്കോട്' പദ്ധതി, തെരുവിൽ കഴിയുന്നവരുടെ പുനരധിവാസം ഉറപ്പ് വരുത്തിയ 'ഉദയം' പദ്ധതി, ക്ഷേമഭവനങ്ങളിലെ ജീവിത സാഹചര്യങ്ങൾ മെച്ചപ്പെടുത്തുന്നതിനുള്ള 'ഹാപ്പി ഹിൽ' പദ്ധതി, പരിസ്ഥിതി സംരക്ഷണ യജ്നങ്ങൾക്ക് ഏകോപനം സാധ്യമാക്കിയ 'കാർബൺ ന്യൂട്രൽ' പദ്ധതി തുടങ്ങിയവ ഇതിൽപ്പെടുന്നു.