മാലിന്യത്തിന് തീപിടിക്കാനുള്ള സാധ്യത ഒഴിവാക്കാൻ ജില്ലാ ഭരണകൂടം അടിയന്തര നടപടികൾ സ്വീകരിക്കും

കോഴിക്കോട് ജില്ലയിലെ മാലിന്യ ശേഖരണ കേന്ദ്രങ്ങളിൽ മാലിന്യത്തിന് തീപിടിക്കാനുള്ള സാധ്യത ഒഴിവാക്കാൻ ജില്ലാ ഭരണകൂടം അടിയന്തര നടപടികൾ സ്വീകരിക്കുന്നു. ഞായറാഴ്ച ജില്ലാ കളക്ടർ എ.ഗീതയുടെ അധ്യക്ഷതയിൽ ചേർന്ന യോഗം ഞെളിയൻപറമ്പിലെ മാലിന്യ സംസ്‌കരണ പ്ലാന്റ് കൈകാര്യം ചെയ്യുന്ന കമ്പനിയോട് വേർതിരിക്കുന്ന പ്ലാസ്റ്റിക്ക് അടിയന്തരമായി നീക്കം ചെയ്യാനും കോഴിക്കോട് കോർപ്പറേഷനോട് ഇത് ഉറപ്പാക്കാൻ ആവശ്യപ്പെട്ടു. ജില്ലാ ദുരന്ത നിവാരണ അതോറിറ്റി നിർദ്ദേശിച്ച പ്രതിരോധ നടപടികൾ അവിടെ നടപ്പാക്കാൻ തീരുമാനമെടുക്കുകയും ആവശ്യമായ ഉപകരണങ്ങളുടെ ലിസ്റ്റ് നൽകാൻ ജില്ലാ ഫയർ ഓഫീസറോട് ആവശ്യപ്പെടുകയും ചെയ്തു.

ഞെളിയൻപറമ്പിൽ നിലവിൽ സ്പ്രിംഗ്ളർ സംവിധാനം അപര്യാപ്തമായതിനാൽ പുതിയത് സ്ഥാപിക്കും. പ്ലാസ്റ്റിക്, രാസവസ്തുക്കൾ എന്നിവയ്ക്ക് തീപിടിക്കുന്ന സാഹചര്യത്തിൽ മണലും നുരയും സ്റ്റോക്കിൽ സൂക്ഷിക്കാൻ അധികൃതർക്ക് നിർദേശം നൽകിയിട്ടുണ്ട്.