കാലിക്കറ്റ് സർവ്വകലാശാല ഇന്റർ സോൺ കലോത്സവം - റെസ റാവോ മലപ്പുറം തേഞ്ഞിപ്പാലത്തെ സർവകലാശാല കാമ്പസിൽ ഞായറാഴ്ച സമാപിച്ചു

കാലിക്കറ്റ് സർവ്വകലാശാലാ ഇന്റർ സോൺ കലോത്സവമായ ‘റെസ റാവോ’ ഞായറാഴ്ച മലപ്പുറം തേഞ്ഞിപ്പാലത്തെ സർവകലാശാല കാമ്പസിൽ സമാപിച്ചു. 122 പോയിന്റ് നേടി പാലക്കാട് ഗവൺമെന്റ് വിക്ടോറിയ കോളേജ് ഓവറോൾ ചാമ്പ്യൻഷിപ്പ് കരസ്ഥമാക്കി. 114 പോയിന്റുമായി ദേവഗിരി സെന്റ് ജോസഫ്‌സ് കോളജും 80 പോയിന്റോടെ ഇരിഞ്ഞാലക്കുട ക്രൈസ്റ്റ് കോളജും രണ്ടും മൂന്നും സ്ഥാനങ്ങൾ കരസ്ഥമാക്കി.

ദേവഗിരി സെന്റ് ജോസഫ് കോളേജിലെ സ്വാതിക എം., കലാതിലകവും,  എംഇഎസ് മമ്പാട് കോളേജിലെ  ശ്രീബേഷ് യു.പി.  കലാപ്രതിഭയുമാണ്. തൃശൂർ ശ്രീ കേരള വർമ്മ കോളേജിലെ  അരുൺ കെ.യു. ചിത്രപ്രതിഭയും, തൃശൂർ സെന്റ് മേരീസ് കോളേജിലെ എസ്.ഗായത്രി സാഹിത്യപ്രതിഭയും നേടി.

പൊതുമരാമത്ത്, ടൂറിസം വകുപ്പ് മന്ത്രി പി.എ. മുഹമ്മദ് റിയാസ്  ഞായറാഴ്ച നടന്ന സമ്മാനദാനവും സമാപന പരിപാടിയും  ഉദ്ഘാടനം ചെയ്തു. കാലിക്കറ്റ് സർവകലാശാല വൈസ് ചാൻസലർ എം.കെ. ജയരാജ് മുഖ്യാതിഥിയായിരുന്നു. കാലിക്കറ്റ് യൂണിവേഴ്സിറ്റി യൂണിയൻ ചെയർപേഴ്സൺ ടി.സ്നേഹ അധ്യക്ഷത വഹിച്ചു.

ജൂലൈ 12 ന് ആരംഭിച്ച കലോത്സവം കോവിഡ് പകർച്ചവ്യാധി മൂലം നീണ്ട മൂന്ന് വർഷത്തെ  ഇടവേളയ്ക്ക് ശേഷമാണ് നടക്കുന്നത്.  നാല് വ്യത്യസ്ത സോണുകളിൽ നിന്നുള്ള വിദ്യാർത്ഥികൾ വിവിധ മത്സരങ്ങളിൽ പങ്കെടുത്തു.