കോഴിക്കോട്: വിനോദത്തിനും രുചിയൂറ്റിയ കോഴിക്കോടൻ വിഭവങ്ങൾ ആസ്വദിക്കാനും വേണ്ടി ബീച്ചിൽ ഒരുങ്ങുന്ന പുതിയ ഫുഡ് സ്ട്രീറ്റ് ഹബ്ബ് ഫെബ്രുവരിയിൽ പ്രവർത്തനമാരംഭിക്കും. കോർപറേഷൻ ഓഫിസിന് മുൻവശത്തുള്ള ബീച്ചിലാണ് ഭക്ഷണത്തെരുവ് സജ്ജീകരിക്കുന്നത്. രുചിയിലും ശുചിത്വത്തിലും മുൻതൂക്കം നൽകി ആരോഗ്യപരമായി സുരക്ഷിതമായ അന്തരീക്ഷത്തിൽ കോഴിക്കോടൻ വിഭവങ്ങൾ ഉപഭോക്താക്കൾക്ക് ലഭ്യമാക്കുന്നതിനാണ് ഈ പദ്ധതി ലക്ഷ്യമിടുന്നത്. ദേശീയ നഗര ഉപജീവന മിഷന്റെയും ആരോഗ്യവകുപ്പിന്റെയും സഹകരണത്തോടെ പദ്ധതി നടപ്പാക്കുന്നു.
പദ്ധതിയുടെ ആകെ ചെലവാകുന്ന തുക 4.06 കോടിയാണ്. ഇതിൽ 2.41 കോടി രൂപ ദേശീയ ആരോഗ്യ മിഷനും ഒരുകോടി രൂപ ഭക്ഷ്യസുരക്ഷാവകുപ്പും വഹിക്കും. ഇപ്പോൾ നിർമാണപ്രവർത്തനങ്ങൾ പൂർത്തിയായിട്ടുണ്ട്. 68 ലക്ഷം രൂപ ചെലവിൽ നിർമാണം നടന്നു. ഡി എർത്ത് ആർകിടെക്റ്റുകൾ രൂപകൽപന നിർവഹിച്ചു, പൊതുമേഖല സ്ഥാപനമായ മെറ്റൽ ഇൻഡസ്ട്രീസാണ് 90 തട്ടുകടകളുടെ നിർമ്മാണം നടത്തിയത്. എല്ലാ ജോലികളും പെട്ടെന്ന് പൂർത്തിയാക്കി ഫെബ്രുവരിയോടെ പദ്ധതി ഉദ്ഘാടനം ചെയ്യാനാകുമെന്ന ഉറപ്പാണ് കോർപറേഷൻ ക്ഷേമകാര്യ സ്റ്റാൻഡിങ് കമ്മിറ്റി ചെയർപേഴ്സൻ പി. ദിവാകരൻ നൽകിയത്.
